ရန်ကုန်ယူနိုက်တက်အသင်း ကွင်းလယ်ကစားသမား ရန်အောင်ကျော် ဘောလုံးသမားဘဝမှအနားယူ
“ကျွန်တော်တို့အတူတူ တိုက်ပွဲဝင်ခဲ့ကြတယ်။
အောင်မြင်မှုအသီးအပွင့်တွေကို အတူတူစားသုံးခဲ့ကြတယ်။
ကျရှုံးတဲ့အခါအတူတူ နာကျင်ခံစားခဲ့ကြတယ်။
ရန်ကုန်ယူနိုက်တက်ဆိုတဲ့အသင်းအပေါ်မှာ သစ္စာရှိရှိအားလုံးပေးဆပ်ခဲ့ကြတယ်။
အခု ကစားသမားဘဝရဲ့ နောက်ဆုံးအချိန်ရောက်လာတဲ့အချိန်မှာလည်း အသင်းအတွက် အကောင်းဆုံးပေးဆပ်ရင်း မြန်မာနေရှင်နယ်လိဂ်ဖလား ၅ ကြိမ်၊ ဗိုလ်ချုပ်အောင်ဆန်းဒိုင်း ၂ ကြိမ်၊ ကွင်းဖွင့်ဖလား ၃ ကြိမ် နဲ့ ရှုံးထွက်ဖလားချန်ပီယံ ၁ ကြိမ် စတဲ့ဆုဖလားတွေ သိမ်းပိုက်ပြီး ကစားသမားဘဝကို အောင်မြင်မှုတွေနဲ့ နှုတ်ဆက်ခဲ့ပါတယ်။”
ရန်အောင်ကျော် (မြန်မာ့လက်ရွေးစင်အသင်းခေါင်းဆောင်ဟောင်း နှင့် ရန်ကုန်ယူနိုက်တက်အသင်းခေါင်းဆောင်)
၂၀၀၉ ခုနှစ်မှစတင်ပြီး ၂၀၂၀ ခုနှစ်အထိ ဆယ်စုနှစ်ကျော်အကြာ ရန်ကုန်ယူနိုက်တက်အသင်းနှင့်အတူ တိုက်ပွဲဝင်ပြီး အောင်မြင်မှု ဆုဖလားများရရှိအောင် စွမ်းဆောင်ပေးခဲ့သည့် မြန်မာ့လက်ရွေးစင်အသင်းခေါင်းဆောင်ဟောင်း နှင့် ရန်ကုန်ယူနိုက်တက်အသင်းခေါင်းဆောင် ရန်အောင်ကျော် အား ရန်ကုန်ယူနိုက်တက်အသင်း နှင့် အသင်းပရိသတ်များကိုယ်စား အထူးပင်ကျေးဇူးတင်ရှိပါသည်။ နောက်လာမည့် အနာဂတ်တွင်လည်း အောင်မြင်သောဘဝကို ရရှိပိုင်ဆိုင်နိုင်ပါစေကြောင်း ဆုမွန်ကောင်းတောင်းအပ်ပါသည်။
ထို့အပြင် အသင်းနှင့်အတူ အောင်မြင်မှုများရရှိအောင် စွမ်းဆောင်ခဲ့သည့် ရန်ကုန်ယူနိုက်တက်အသင်း ခေါင်းဆောင် ရန်အောင်ကျော် ဝတ်ဆင်ခဲ့သည့် နံပါတ် ၂၅ အား ရန်အောင်ကျော်ကို ဂုဏ်ပြုသည့်အနေဖြင့် အနားပေးသွားမည်ဖြစ်ပါသည်။