GFA အသင်းနဲ့ပွဲစဉ်မှာ အနိုင်ရရှိအောင်ကြိုးစားသွားမယ်လို့ ထက်ဖြိုးဝေ ဆို

မနက်ဖြန်ယှဉ်ပြိုင်ကစားမယ့် GFA အသင်းနဲ့ပွဲစဉ်မှာ အနိုင်ရရှိအောင် ကြိုးစားယှဉ်ပြိုင်သွားမယ်ဟု ရန်ကုန်ယူနိုက်တက် ကွင်းလယ်ကစားသမား ထက်ဖြိုးဝေက ပြောကြားခဲ့သည်။

၂၀၂၂ မြန်မာနေရှင်နယ်လိဂ် ပွဲစဉ် ၁၇ တွင် GFA အသင်းနှင့် ရန်ကုန်ယူနိုက်တက်အသင်းတို့ တွေ့ဆုံနေပြီး အဆိုပါ ပွဲစဉ်ကို နိုဝင်ဘာလ ၂ ရက်နေ့၊ ညနေ ၃:၃၀ နာရီ၊ သုဝဏ္ဏအားကစားကွင်းတွင် ယှဉ်ပြိုင်ကစားကြမည် ဖြစ်သည်။

အဆိုပါပွဲစဉ်နှင့် ပတ်သတ်ပြီး ထက်ဖြိုးဝေက “ကျွန်တော်တို့အသင်းအနေနဲ့ အနိုင်ရဖို့အတွက် အကောင်းဆုံး ပြင်ဆင်ထားပါတယ်၊ တဖက်အသင်းကလည်း အမှတ်ရရှိဖို့အတွက် ကြိုးစားလာမှာဖြစ်တာကြောင့် ကစားရတာတော့ ခက်ခဲနိုင်ပါတယ်၊ အဲ့တာကြောင့် တဖက်အသင်းကို လျော့မတွက်ပဲ အနိုင်ရရှိအောင် ကြိုးစားသွားမှာပါ” ဟု ပြောကြားခဲ့သည်။

ရန်ကုန်အသင်းနှင့် GFA အသင်းတို့၏ မြန်မာနေရှင်နယ်လိဂ်ပထမအကျော့တွေ့ဆုံမှုတွင် ရန်ကုန်အသင်းက ၂-၀ ဂိုးဖြင့်အနိုင်ရရှိခဲ့သည်။

ထို့အပြင် ထက်ဖြိုးဝေက “ကျွန်တော်တို့ ပိုပြီး ကြိုးစားနေပါတယ်၊ လိုချင်တဲ့ အနိုင်ရလဒ်ရရှိအောင် ကြိုးစားသွားမှာပါ၊ အားပေးကြပါဦး” ဟု ပြောကြားခဲ့သည်။

ရန်ကုန်ယူနိုက်တက်အသင်းသည် မြန်မာနေရှင်နယ်လိဂ် ပွဲစဉ် ၁၅ ပွဲ ယှဉ်ပြိုင်ကစားပြီးချိန်တွင် ၁၀ ပွဲနိုင်၊ ၂ ပွဲသရေ၊ ၃ ပွဲရှုံး၊ ရမှတ် ၃၂ မှတ်ဖြင့် အမှတ်ပေးဇယားဒုတိယနေရာတွင် ရပ်တည်နေပြီး GFA အသင်းကတော့ ပွဲစဉ် ၁၆ ပွဲယှဉ်ပြိုင်ကစားပြီးချိန်တွင် ၃ ပွဲနိုင်၊ ၁ ပွဲသရေ၊ ၁၂ ပွဲရှုံး၊ ရမှတ် ၁၀ မှတ်ဖြင့် အဆင့် ၉ နေရာတွင် ရပ်တည်နေ သည်။