ရန်ကုန်ယူနိုက်တက် (ယူ-၂၀) အသင်းနှင့် Junior Lions အသင်းတို့ရဲ့ပွဲစဉ် သရေရလဒ်ထွက်ပေါ်ခဲ့

ယနေ့ ပဒုမ္မာကွင်းတွင်ယှဉ်ပြိုင်ကစားခဲ့သည့် ရန်ကုန်ယူနိုက်တက်(ယူ-၂၀) အသင်းနှင့် Junior Lions အသင်းတို့ပွဲစဉ်တွင် တစ်ဖက် တစ်ဂိုးစီဖြင့် သရေရလဒ်ထွက်ပေါ်ခဲ့သည်။

ယနေ့ပွဲစဉ်သည်ဂနှစ်သင်းစလုံးအတွက်အရေးပါသည့်ပွဲစဉ်တစ်ပွဲဖြစ်ခဲ့ပြီး ပွဲစစချင်းမှာပင် အပြန်လှန်တိုက်စစ်ဆင်မှုများပြုလုပ်ခဲ့ကြသည်။ ရန်ကုန်ယူနိုင်တက်အသင်းအတွက် ဦးဆောင်ဂိုးကို ပထမပိုင်းပြီးခါနီး အချိန်ပို ၁ မိနစ်တွင်တောင်ပံကစားသမား ကောင်းခန့်ကျော်က ရရှိလာတဲ့အလွတ်တည်ကန်ဘောကနေတဆင့် သွင်းယူပေးခဲ့သည်။

ဒုတိယပိုင်းတွင်လည်း ဆက်လက်ကြည့်ကောင်းခဲ့ပြီး နှစ်ဖက်စလုံး လူစာရင်းအပြောင်းလဲများနှင့် အနိုင်ရရှိရေးကိုဦးတည်ကစားခဲ့ကြသည်။ Junior Lions အသင်းကချေပဂိုးကို ပွဲချိန်(၆၈) မိနစ်တွင် ရရှိလာသော ထောင့်ကန်ဘောကနေတဆင့် အသင်းခေါင်းဆောင် ကျော်သီဟမှ ခေါင်းတိုက်သွင်းယူပေးခဲ့ပြီး ပွဲပြီးဆုံးချိန်တွင် တစ်ဖက်တစ်ဂိုးစီနှင့် သရေရလဒ်ထွက်ပေါ်ခဲ့သည်။

ရန်ကုန်ယူနိုက်တက် (ယူ-၂၀) အသင်းသည် လက်ရှိတွင် ပွဲ ၂၁ ကစား၊ ၁၀ပွဲနိုင် ၊ ၄ပွဲသရေ၊ ၇ပွဲရှုံး၊ ရမှတ် ၃၄ မှတ်ရရှိထားပြီး လာမည့် နိုဝင်ဘာ ၁၉ ရက်နေ့တွင် ရခိုင်ယူနိုက်တက် (ယူ-၂၀) အသင်းနှင့် ပဒုမ္မာအားကစားကွင်းတွင် ဆက်လက်ယှဉ်ပြိုင်ကစားသွားမည်ဖြစ်သည်။

Yangon United (U-20) played out a 1-1 draw against Junior Lions