မဟာယူနိုက်တက်အသင်းကို တစ်ဂိုး ဂိုးမရှိဖြင့် ရန်ကုန်ယူနိုက်တက်အသင်း အရေးနိမ့်

ယနေ့ညနေက သုဝဏ္ဏကွင်းတွင် ယှဥ်ပြိုင်ကစားခဲ့သည့် မြန်မာနေရှင်နယ်လိဂ် ပွဲစဥ် ၁၆ (လက်ကျန်ပွဲစဥ်) တွင် ရန်ကုန်ယူနိုက်တက်အသင်းသည် မဟာယူနိုက်တက်အသင်းကို ၁-၀ ဂိုးဖြင့် အရေးနိမ့်ခဲ့သည်။ မဟာယူနိုက်တက်အသင်းအတွက် သွင်းဂိုးကို အောင်လှိုင်ဝင်း က ပွဲချိန် ၃၄ မိနစ်တွင် ပင်နယ်တီမှတဆင့် သွင်းယူခဲ့ခြင်း ဖြစ်သည်။
ယနေ့ပွဲစဥ်တွင် ရန်ကုန်ယူနိုက်တက်အသင်းသည် ၄-၄-၂ ကစားကွက်ဖြင့် ပွဲထွက်ခဲ့ပြီး ပွဲစသည်နှင့် ဘောလုံး ပိုင်ဆိုင်မှုအသာဖြင့် ကစားနိုင်ခဲ့သည်။ ပွဲချိန် ၁၆ မိနစ်တွင် ရန်ကျော်ထွေး ပေးပို့မှုမှတဆင့် ရန်နိုင်ဦး ဂိုးကန်သွင်း ခွင့် ရရှိခဲ့သော်လည်း မဟာယူနိုက်တက်အသင်း ဂိုးသမား ကာကွယ်နိုင်ခဲ့သည်။ ပွဲချိန် ၂၉ မိနစ်တွင် ရန်နိုင်ဦး ကန်တင် ပေးသည့် ထောင့်ကန်ဘောမှတဆင့် သူရိန်စိုး ခေါင်းတိုက်ခွင့် ရရှိခဲ့သော်လည်း ဂိုးပေါက်လွဲချော်ခဲ့သည်။ ပွဲချိန် ၃၂ မိနစ်တွင် မဟာယူနိုက်တက်အသင်း ကွင်းလယ်လူ နေလင်းစိုးကို ပင်နယ်တီ ဧရိယာအတွင်း ရန်နိုင်ဦး ဖြတ်ထုတ်ပုံ ကြမ်းခဲ့သောကြောင့် ပင်နယ်တီ ပြစ်ဒဏ်ဘောခွင့်ပြုခဲ့ရပြီး အောင်လှိုင်ဝင်း က ကန်သွင်းခဲ့ကာ မဟာယူနိုက် တက်အသင်း ဦးဆောင်ဂိုးရရှိခဲ့သည်။ ထို့နောက် ရန်ကုန်ယူနိုက်တက်အသင်း ချေပဂိုးပြန်လည်ရရှိရန် ကြိုးစားခဲ့ သော်လည်း ဂိုးမရရှိခဲ့သောကြောင့် ပထမပိုင်းပြီးဆုံးချိန်တွင် ၁-၀ ဂိုးဖြင့် မဟာယူနိုက်တက်အသင်း ဦးဆောင်ခဲ့သည်။
ပွဲချိန် ဒုတိယပိုင်းတွင် ရန်ကုန်ယူနိုက်တက်အသင်း ချေပဂိုးပြန်လည်ရရှိရန် ထပ်မံကြိုးစားလာခဲ့ပြီး ပွဲချိန် ၄၉ မိနစ် တွင် ဇော်ဝင်းသိန်း ၏ ဖြတ်တင်ဘောမှတဆင့် ဇော်ရဲထွန်း ဂိုးတိုက်ခွင့် ရရှိခဲ့သော်လည်း ဂိုးပေါက်နှင့် လွဲခဲ့သည်။ ပွဲချိန် မိနစ် ၇၀ တွင် ရန်နိုင်ဦး နှင့် သာယာဝင်းထက် အစား လမင်းထွေး နှင့် ဥက္ကာနိုင်တို့ကို ထည့်သွင်း အသုံးပြုခဲ့သလို ပွဲချိန် မိနစ် ၈၀ တွင် ရန်ကျော်ထွေး အစား စအောင်ပြည့်ကို ကို ထည့်သွင်းအသုံးပြုခဲ့သည်။ ပွဲချိန် ၇၂ မိနစ်တွင် ဒေးဗစ်ထန်း ၏ ဖြတ်တင်ပေးပို့မှုတဆင့် ရန်ကျော်ထွေး တဖက်အသင်း ဂိုးသမားနှင့် ပင်နယ်တီ စည်းဧရိယာပြင်ပတွင် တစ်ဦးချင်း ထိပ်တိုက်တွေ့ဆုံခဲ့ပြီး မဟာယူနိုက်တက်ဂိုးသမား အောင်ကိုလတ် ၏ ဖြတ်ထုတ်ပုံ ကြမ်းတမ်းခဲ့သောကြောင့် ဂိုးရရှိမည့် အခွင့်အရေးနှင့် လွဲချော်ခဲ့သည်။ ထို့နောက် ပွဲချိန် ၈၁၊ ၈၄၊ ၉၀ မိနစ်များတွင် ရန်ကုန်ယူနိုက်တက် အသင်း အခွင့်အရေးများ ရရှိခဲ့သော်လည်း မဟာယူနိုက်တက်အသင်း ဂိုးသမား ကာကွယ်နိုင်ခဲ့သောကြောင့် ပွဲပြီးဆုံးချိန်တွင် မဟာယူနိုက်တက် အသင်းကို ၁-၀ ဂိုးဖြင့် အရေးနိမ့်ခဲ့သည်။
ပွဲအပြီးတွင် ရန်ကုန်ယူနိုက်တက်အသင်းနည်းပြချုပ် ဂတ်ဇီ က “ပြောရမယ်ဆိုရင်တော့ အရမ်းကြီးမဆိုးခဲ့ပါဘူး၊ ဒုတိယပိုင်းမှာ အကောင်းဆုံးပြန်လာနိုင်ခဲ့ပေမယ့် အမှားတွေအများကြီးရှိခဲ့တယ်။ ပေးတာတွေမှားတယ်။ ဒါကကျွန်တော်တို့ ကစားသင့်တဲ့ပုံစံမဟုတ်ပါဘူး။” ဟု ပြောကြားခဲ့သည်။
ရန်ကုန်ယူနိုက်တက်အသင်းသည် မြန်မာနေရှင်နယ်လိဂ်ပွဲစဥ် ၂၁ ပွဲ ယှဥ်ပြိုင်အပြီးတွင် ၁၆ ပွဲနိုင်၊ ၂ ပွဲသရေ၊ ၃ ပွဲရှုံး ရမှတ် ၅၀ ဖြင့် အမှတ်ပေးဇယားအဆင့် ၂ နေရာတွင် ဆက်လက်ရပ်တည်နေပြီး ၂၀၂၃ မြန်မာနေရှင်နယ်လိဂ် နောက်ဆုံးပွဲစဥ်အဖြစ် ဒီဇင်ဘာလ ၁၈ ရက်တွင် ရှမ်းယူနိုက်တက်အသင်းနှင့် သုဝဏ္ဏကွင်းတွင် ယှဥ်ပြိုင်ရမည် ဖြစ်သည်။