မြဝတီအမျိုးသမီးအသင်းကို အနိုင်ရရှိခဲ့သည့် ရန်ကုန်ယူနိုက်တက်အမျိုးသမီးအသင်း
မြန်မာအမျိုးသမီးလိဂ် ၂၀၂၄ ပွဲစဉ်အဖြစ် ပဒုမ္မာကွင်းတွင် ယနေ့ညနေက မြဝတီအမျိုးသမီးအသင်း နှင့် ရန်ကုန်ယူနိုက်တက်အမျိုးသမီးအသင်း တို့ယှဉ်ပြိုင်ကစားခဲ့ရာ ရန်ကုန်ယူနိုက်တက်အမျိုးသမီးအသင်းက (၁-၀)ဂိုးဖြင့် အနိုင်ရရှိခဲ့သည်။
ယနေ့ပွဲစဉ်တွင် ရန်ကုန်ယူနိုက်တက်အမျိုးသမီးအသင်းသည် ကစားသမားအချို့အပြောင်းလဲလုပ်ကာ ပွဲထွက်လာခဲ့ပြီး မြဝတီအမျိုးသမီးအသင်းကို ရင်ဆိုင်ခဲ့သည်။ ထို့နောက် ပွဲစစချင်း (၈) မိနစ်မှာပဲဦးဆောင်ဂိုးရရှိခဲ့ပြီး ယွန်းဝတီလှိုင်၏ဖြတ်တင်ပေးပို့မှုမှတဆင့် ဇင်မိုးပြည့်မှခေါင်းတိုက်သွင်းယူပေးခဲ့သည်။
ပွဲချိန်ဒုတိယပိုင်းတွင် ထပ်မံဂိုးရရှိရန်ယှဉ်ပြိုင်ခဲ့ကြသော်လည်း ဂိုးကန်သွင်းယူမှု အနည်းငယ်သာရရှိခဲ့ကြသည်။ ရရှိလာသော ဂိုးပေါက်ကန်သွင်းမှုအချို့တွင် အဆုံးသတ်အားနည်းမှုများကြောင့် ဂိုးများထပ်မံမြင်တွေ့ရခြင်းမရှိတော့ဘဲ ပွဲပြီးဆုံးချိန်တွင် ရန်ကုန်ယူနိုက်တက်အမျိုးသမီးက (၁-၀) ဂိုးဖြင့် မြဝတီအမျိုးသမီးအသင်းကိုအနိုင်ရရှိခဲ့သည်။
ရန်ကုန်ယူနိုက်တက်အမျိုးသမီးအသင်းသည် ပွဲစဉ် ၁၇ ပွဲကစား၊ ၁၂ ပွဲနိုင်၊ ၃ ပွဲသရေ၊ ၂ ပွဲရှုံး၊ ရမှတ် ၃၉ မှတ် နှင့် ဒုတိယနေရာတွင်ရပ်တည်နေပြီး လာမည့် နိုဝင်ဘာ ၉ ရက်နေ့၊ သုဝဏ္ဏကွင်းတွင် Myanmar Women League 2024 ရာသီနောက်ဆုံးပွဲစဉ်အဖြစ် ISPEအမျိုးသမီးအသင်းနှင့် ယှဉ်ပြိုင်ကစားမည်ဖြစ်သည်။