လူငယ်နောက်ခံကစားသမား ယမင်းဖြူ အား ရန်ကုန်ယူနိုက်တက်အမျိုးသမီးအသင်း ခေါ်ယူအားဖြည့်

ရန်ကုန်ယူနိုက်တက်အမျိုးသမီးအသင်းသည် ၂၀၂၄ မြန်မာအမျိုးသမီးလိဂ်ပြိုင်ပွဲ (ဒုတိယအကျော့)အတွက် ပြင်ဆင်မှုများစွာပြုလုပ်လျက်ရှိပြီး လူအင်အားထပ်မံဖြည့်တင်းမှုအဖြစ် YREO အသင်းမှ လူငယ်နောက်ခံ ကစားသမား ယမင်းဖြူ အားခေါ်ယူခဲ့သည်။
အသက် ၁၇ နှစ်အရွယ်သာရှိပြီး ငယ်ရွယ်သော်လည်း နိုင်ငံတကာပြိုင်ပွဲနှင့် ပြည်တွင်းပြိုင်ပွဲ အတွေ့အကြုံ ကောင်းများ ပိုင်ဆိုင်ထားသည့် ယမင်းဖြူသည် YREO အသင်းမှမွေးထုတ်သင်ကြားပေးခဲ့ပြီး ၅ နှစ်ကြာကစားခဲ့ပြီးနောက် ရန်ကုန်ယူနိုက်တက်အမျိုးသမီးအသင်းကို ပြောင်းရွှေ့လာခြင်းဖြစ်သည်။
ရန်ကုန်ယူနိုက်တက်အသင်းကိုရောက်ရှိလာခဲ့ခြင်းအပေါ် “ရန်ကုန်ယူနိုက်တက်အသင်းကိုရောက်ရှိလာရတာ အရမ်းဝမ်းသာပါတယ်။ ဆရာကောင်းတွေနဲ့ သူငယ်ချင်းအသစ်တွေနဲ့အတူ အသင်းအောင်မြင်မှုအတွက် ကြိုးစားယှဉ်ပြိုင်သွားပါမယ်” ဟု ကစားသမားသစ် ယမင်းဖြူက ဝမ်းသာပီတိစကားပြောကြားခဲ့သည်။
ရန်ကုန်ယူနိုက်တက်အမျိုးသမီးအသင်း၏ ဒုတိယအကျော့ပွဲစဉ်ကို ဇူလိုင်လ ၁၈ ရက်နေ့တွင်ပြန်လည် စတင်သွားမည်ဖြစ်ပြီး YREO အသင်းနှင့် YUSC ကွင်းတွင် ယှဉ်ပြိုင်ကစားရမည်ဖြစ်သည်။